Nairobi (Halqaran.com) – Dowladda Kenya ayaa markale ka Jawaabtay eedeyn Khamiistii lasoo dhaafay dowladda Federaalka Soomaaliya u jeedisay, taasi oo aheyd in Kenya ay faragelin cad ka wado xuduudka labada dal ay wadaagan.
War qoraal ah oo kasoo baxay Wasaaradda Arrimaha Dibadda Kenya ayaa waxaa lagu sheegay in aysan waxba ka jirin eedii uga timid dowladda Soomaaliya ee la xariirtay in faragelin ay ku wado Siyaasadda Arrimaha gudaha dalka iyo xuduudka labada dal.
Wasaaradda Arrimaha Dibadda Kenya ayaa sheegtay inay Cabasho ka yihiin qoraal uu Safiirka Soomaaliya ee Qaramada Midoobay u gudbiyay Golaha Ammaanka, kaasi oo lagu sheegay in Kenya ay faragelin ku wado Somalia, waxaana sidaas qoray Wargeyska Daily Nation ee ka soo baxa Nairobi oo tilmaamay inuu arkay qoraalka kasoo baxay Kenya.
Soomaaliya ayaa eedeyntii Kenya ay u jeedisay waxa ay aheyd faragelin toos ah inay ku hayso Siyaasadda Soomaaliya iyo sidoo kale xuduudaha Soomaaliya.
Inkastoo Kenya iyo Soomaaliya ay yihiin laba dal oo jaar ah, haddana Kenya inta badan waxa ay faragelin muuqata ku sameysa Siyaasadda Soomaaliya, waana midda keentay cabashada dowladda ka soo yeertay.
Kenya waxaa ka jooga Soomaaliya Ciidamo ku hawlgala magaca Amisom, waxaana ay ka shaqeeyaan Jubbooyinka iyo Gedo, balse faragelin kale oo Siyaasi ah ayeey Soomaaliya ka gaysataa Kenya.
Xafiiska Wararka Halqaran.com
Halqarannews@gmail.com
