Kismaayo (Halqaran.com) – Wasiirka Wasaaradda Qorheynta dowlad goboleedka Jubbaland, Cabdiraxmaan Cabdi Axmed ayaa sheegay in lacag hal Milyan oo Dollar ah oo Xukuumaddii Ra’iisul Wasaarihii hore Maxamed Xuseen Rooble u qoondeeysay gurmadka abaaraha la siyaasadeeyay.
Cabdiraxmaan Cabdi Axmed ayaa waxa uu sheegay in lacagtaas kaliya Maamulka Jubbaland laga soo gaarsiiyay tiro laba jeer ah oo min 10 kun oo dollar la soo diray, isaga oo sheegay in lacagaha iyo deeqaha macaawinada ah ee loogu talo galay abaaraha ay noqdeen kuwo lagu raadsado saxiibtinimo ama xil Wasiir.
Wasiirka Wasaaradda Qorheynta Maamulka Jubbaland Cabdiraxmaan Cabdi Axmed wuxuu sheegay in deeq kasta oo ka timaada Caalamka ay aheyd in dowladda federaalka & dowlad Goboleedyada ay ka tashadaan sida loo qeybinayo, balse taasi ay meesha ka baxday oo dad gaar ah ay jeebka ku shubteen.
Sidoo kale, wuxuu xusay, in cabashadooda Madaxweynaha Jubbaland uu u gudbiyay Madaxda Sare ee dowladda Soomaaliya, ayna rajeeynayaan in Madaxweyne Xasan Sheekh uu aqbalo in si siman oo wadatashi ah loo qeybiyo deeqaha Caalamka uga yimaado Soomaaliya.
Wasiirka Wasaaradda Qorheynta ee maamulka Jubbaland ayaa hadalkiisa imaanaya, xilli dhowrkii sano ee la soo dhaafay uu aad u xumaa xiriirka Dowladdii uu hoggaaminayay Madaxweyne hore ee Soomaaliya, Mudane Maxamed Cabdullaahi Farmaajo iyo Jubbaland.
Xafiiska Wararka Halqaran.com
Halqarannews@gmail.com
