Minnesota (Halqaran.com) – Allaha u naxariistee waxaa xalay dalka Mareykanka ku geeriyooday, Nuur Cumar Maxamed oo ah Aabaha dhalay Ilhaan Cumar.
Ilhaan Cumar oo ka tirsan Aqalka Congress-ka Mareykanka ayaa waxay barraha bulshada ku shaacisay geerida naxdinta leh ee ku timid aabaheyd.
“Dhab ahaantii Alle ayaa ina leh, isagaana u laabaneynaa. Waa murugo aad u weyn iyo xanuun inaan macsalaameeyo aabahey Nuur Cumar Maxamed. Ereyo kuma qeexi karo waxa uu aniga iiga dhignaa iyo dhammaan intii garaneysay iyo intii jecleydba.” Ayay tiri Ilhaan Cumar.
Warbaahinta Mareykanka ayaa qoreysa in marxuum Nuur Cumar Maxamed uu u geeriyooday xanuunka dilaaga ah ee Coronavirus, inkastoo Ilhaan Cumar aynaan taasi ku xusin qoraalkeeda.
Ilhaan Cumar oo laga soo doorto Gobolka Minnesota ee dalka Mareykanka ayaa sanadkii 2018-kii loo doortay xubin ka tirsan Aqalka Congress-ka Mareykanka, waxayna noqotay gabadhii labaad oo Muslim ah, oo markii ugu horeysay xubno ka noqda Congress-ka Mareykanka.
Xafiiska Wararka Halqaran.com
Halqarannews@gmail.com
