Muqdisho (Halqaran.com) – Duqii magaalada Muqdisho, ahaana gudoomiyihii Maamulka Gobolka Banaadir ayaa Khamiistii maanta magaalad Dooxa ee dalka Qatar ugu geeriyooday dhaawacii toddobaadkii hore ka soo gaaray qaraxii ka dhacay Xarunta Dowladda Hoose Xamar.
Allaha u naxariistee, Cabdi-raxmaan Cumar Cismaan (Eng. Yariisow) ayaa 1-dii duhurnimo ee maanta ku geeriyooday Isbitaal Magaalada Dooxa ku yaala, halkaasi oo maalmihii la soo dhaafay lagula tacaalayay xaaladiisa caafimaad.
Danjire Cabdirisaaq Faarax Cali (Taano), Danjiraha Soomaaliya u fadhiya dalka Qatar ayaa xaqiijiyay geerida ku timid Guddoomiyihii Maamulka Gobolka Banaadir.
Warar ay helayso warbaahinta Halqaran.com, ayaa sheegaya in meydka Eng. Yariisow loo soo qaadi doono Magaalada Muqdisho, si aas ay Madaxda sare ee Dowladda Soomaaliya ka qaybgalaan loogu sameeyo.
Geerida ku timid guddooihii gobolka Banaadir Eng. Yariisow waxay ku soo aadaysaa, xilli Villa Soomaaliya ay ka cago-jiideyso in ay soo bandhigto natiijada baaritaankii lagu sameeyay qaraxii 24-kii bishii hore ee July ka dhacay Xarunta Maamulka Gobolka Banaadir.
Qaraxaasi ayaa sheegatay mas’uuliyadeeda Ururka Al-Shabaab oo dagaal adag kula jira Dowladda Soomaaliya.
Isku soo wada-duub, haddii baaritaankii la sameeyay aan bannaanka lagu soo dhigin ciddii ka masuulka ahayd qaraxaasi ayaa waxaa la xaqiiqsan doonnaa shakigii ay inta badan dadku ka qabeen in masuuliyiin ka tirsan Dowladda Soomaaliya ay fududeeyeen qaraxaasi.
Xafiiska Halqaran.com, Muqdisho
Halqarannews@gmail.comÂ
