J/Hoose (Halqaran.com) – Ciidamada Kumaandooska Danab ayaa Howlgal qorsheysan ka fuliyay deegaanno ka tirsan Gobolka Jubbada Hoose, howlgaladaas oo ahaa kuwo ka dhan ah Ururka Al-Shabaab oo mararka qaar weeraro ka fuliya Gobolkaas.
Saraakiisha Ciidamada ayaa waxaa ay sheegeen in howlgallada ay ka fuliyeen deegaannada kala ah, Dhisheeg waamo, Maroodi gubow, Dhaay unbow oo qiyaasti 75km u jirta Magaalada Kismaayo.
Taliyaha Guutadda 16 ee Kumaandooska Danab, Gaashaanle Ismaciil Cabdi Maalik Maalin ayaa Idaacadda Ciidamada qalabka Sida u sheegay in Ciidamada Danab Kumaandooska Soomaliya ay ku daateen Saldhigyada Al-Shabaab ku lahayeen deegaanno hoosta Gobolka Jubbada Hoose
Wuxuu intaasi raaciyay taliyaha in Ciidamada Danab ay Howlgalka ku dileen Labo Sarkaal iyo 11 Xubnood oo ka tirsan Al-Shabaab, xilli ay ku sugnaayeen deegaannada ay Ciidamada howlgallada ka fuliyeen.
Taliyaha Kumaandooska Soomaaliya ayaa Saraakiisha Howlgalka lagu dilay waxa uu Magacyadooda ku kala sheegay Xirow oo Al-shabaab u qaabilsanaa deegaanka Dhisheeg waamo, iyo Cabdi Maxamed Bashiir oo Al-Shabaab u qaabilsanaa gobolka Jubbada Hoose.
Waxaa maalmihii la soo dhaafay deegaano iyo degmooyin ka tirsan gobolka Jubbada Hoose ay howlgallo ka wadeen Ciidamada Dowladda iyo kuwa Jubbaland, waxaana jirtay weerarro ay kala kulmeen Al-Shabaab.
Xafiiska Wararka Halqaran.com
Halqarannews@gmail.com
