Muqdisho (Halqaran.com) – Golaha Aqalka Sare ee Baarlamaanka Soomaaliya ayaa Sabtidii maanta ansixiyay Sharciga Doorashooyinka Qaranka, ka dib kulan ay ku yeesheen Magaalada Muqdisho.
Kulanka 35aad ee Kalfadhiga 6aad ee Golaha Aqalka Sare oo uu shir guddoominayay Cabdi Xaashi Cabdullaahi, Gudoomiyaha Golaha Aqalka Sare ayuu ajandihiisu ahaa akhrinta 3aad ee Hindise Sharciyeedka Doorashooyinka Qaranka.
Guddomiyaha Guddiga Kumeel Gaarka ee Ka-baraandegista Hindise Sharciyeedka Doorashooyinka Qaranka ayaa ka hor akhriyay Golaha Aqalka Sare warbixinta akhrinta 3aad ee Hindise sharciyeedka Doorashooyinka Qaranka.
Senatorada Golaha Aqalka Sare ayaa codka u qaaday Hindise Sharciyeedkan, waxaana haa ugu codeysay 27 Senator, iyadoo ay 6 diiday, mana jirin cid ka aamustay.
Gudoomiyaha Golaha Aqalka Sare ayaana ku dhawaaqay in goluhu uu cod aqlabiyad leh ku ansixiyay Sharciga Doorashooyinka Qaranka.
Xildhibaanada Golaha Shacabka ee Baarlamaanka Somaliya ayaa la xusuustaa inay Sharciga Doorashooyinka Qaranka meelmariyeen 28-kii bishii December ee sanadkii 2019.
Xafiiska Wararka Halqaran.com
Halqarannews@gmail.com
