Muqdisho (Halqaran.com) – Guddoomiyaha Gobolka Banaadir ahna Duqa Magaalada Muqdisho, Mr Cumar Maxamed Maxamuud (Cumar Filish) oo Shir jaraa’id qabtay ayaa waxa uu faray bulshada ku nool Caasimadda in ay u dhega nuglaadaan farriimaha caafimaad iyo wacyigalin ee uu wado Maamulka Gobolka Banaadir ee loogu hortagayo faafitaanka caabuqa Coronavirus (COVID-19).
Cumar Filish ayaa sidoo kale tilmaamay inay ciqaab la kulmi doonan cidii fulin weysa awaamiirta ay soo saartay Wasaarada Caafimaadka ee la xariirta cudurka Coronavirus.
Duqa magaalada Muqdisho ayaa ku hanjabay inuu tallaabo ka qaadi doono ciddii aan fulin amarrada maamulka wixii ka dambeeya 15-ka bishaan Maarso.
Guddoomiyaha gobolka Banaadir ahna Duqa Muqdisho ayaa dadka ku sugan goobaha ganacsiga xusay, in looga baahan yahay in aysan waxba ka iibin cid aan wadan Afxirka si looga hortaggo cudurka Covid-19.
‘‘Laga bilaabo 15 bishaan, cid walba oo aan u hoggaansamin talooyinka looga hortagayo Covid-19, ciqaab iyo ganaax ayuu muteysan doonaa” ayuu yiri Guddoomiyaha gobolka Banaadir ahna Duqa Muqdisho Cumar Filish.
Xafiiska Wararka Halqaran.com
Halqarannews@gmail.com
