Galgaduud (Halqaran.com) – Ciidamada xoogga dalka Soomaaliyeed oo kaashanaya dadka deegaanka ayaa howlgallo xoogan waxaa ay weli ka wadaan deegaanno katirsan Gobolka Galgaduud, halkaas oo tobanaankii sano ee la soo dhaafay ay gacanta kuhayeen Ururka Al-Shabaab.
Ciidamada ayaa howlgal ay maanta fuliyeen waxaa ay la wareegeen Tuulada Baraag Sheekh Caamir oo u dhaxeysa deegaannada Galcad iyo Masagawaay ee Gobolka Galgaduud, kadib markii ay isaga baxeen dagaal la’aan Ururka Al-Shabaab.
Saraakiil ka tirsan Ciidamada dowladda ayaa warbaahinta u sheegay in intii ay howlgalka ku jireen ay gacanta ku dhigeen Sarkaalkii Al-Shabaab u qaabilsanaa Tuulada Baraag Sheekh Caamis, kaas oo lagu Magacaabo Cabdi Cali gadiid.
Sidoo kale, saraakiishu waxaa ay sheegeen in xilliga la qabanayay Sarkaalka katirsan Al-Shabaab uu raashin u waday xubno katirsan Al-Shabaab, balse ay Ciidamadu qabteen.
Waxaa weli howlgallo xooggan ka socda deegaanno katirsan Gobolka Galgaduud, iyada oo Ciidamada dowladda iyo kuwa deegaanka ay dhowrkii Bilood ee la soo dhaafay la wareegeen degaano dhowr ah oo ay gacanta ku hayeen Al-Shabaab.
Xafiiska Wararka Halqaran.com
Halqarannews@gmail.com
