Cadaado (Halqaran.com) – Waxaa jira dareen xoog badan oo ka dhashay in xanuunka COVID-19 uu si weyn ugu faafayo Magaalada Cadaado ee Gobolka Galgaduud, xilli aanu oolin qalabka lagu baaro xanuunkaasi.
Isbitaalka Guud ee Cadaado ayaa waxaa xalay siyaabooyin kala duwan ugu geeriyooday laba qof, oo midi uu yahay oday da’ ahaa iyo nin kaloo ganacsade, kuwaa oo si weyn looga yaqaanay halkaasi.
Dr. Cabdirisaaq, Cabdullaahi Qaarey, Agaasimaha Guud ee Isbitaalka Cadaado ayaa maanta sheegay in Magaalada Cadaado lagu arkay dad fara-badan oo qaba calaamadaha lagu garto xanuunsidaha COVID-19, ee uu keeno Coronavirus.
Waxaa uu sheegay in labadii toddobad ay aad u soo kordheen dadka ka cabanaya hargab, qandho, madax xanuun daran, urka, dhadhanka oo ka tagay iyo naqaska oo ku dhegaya.
Labada nin ee xalay ku dhintay Isbitaalka Cadaado ayuu sheegay inaanay xaqiijin karin in ay xanuunka u dhinteen iyo in kale, marka laga soo taggo in lagu arkay astaamaha lagu aqoonsado xanuunka.
Xafiiska Wararka Halqaran.com
Halqarannews@gmail.com
