Burco (Halqaran.com) – Bannaanbax ballaaran oo loogu soo horjeedo dalka Faransiiska ayaa maanta ka dhacay magaalada Burco ee Somaliland
Dadka bannaanbaxayay ayaa watay boorar ay ku qoran yihiin erayo ka dhan ah Faransiiska, iyaga oo sidoo kale gubayay sawirka madaxweyne Emmanuel Macron .
Maamulka magaalada Burco ayaa sheegay in bannaanbaxu uu markii hore ahaa mid yar, balse ay marba marka ka dambeysay dadku soo kordhayeen.
Dadka ka dhex muuqday dibadbaxa waxaa ka mid ah ganacsatada magaalada oo sheegay inay joojin doonaan badeecada ka timaadda dalka Faransiiska.
Ololaha qaadacaadda alaabta uu soo saaro Faransiiska ayaa ku baahay dalal badan oo Carab ah, taas oo ka dhalatay hadalkii Madaxweynaha dalkaas Macron, kaddib weerarkii lagu dilay macallinkii ardeydiisa tusay sawir lagu sheegay Nabi Maxamed NNKH.
Arrintaan ayaa imaanaysa kaddib markii 16-kii bishan Oktoobar gudaha dalka Faransiiska lagu dilay macallin la oran jiray Samuel Paty.
Si kastaba, dilka macallinkaasi kahor, Madaxweyne Macron ayaa waxa uu islaamka ku tilmaamay Diin qalalaase ku jirta, islamarkaana uu ku dhawaaqay qorshe uu ku sheegay inuu kaga hortagayo ‘Islaamiyiinta doonaya gooni u goosadka‘.
Xafiiska Wararka Halqaran.com
Halqarannews@gmail.com
