Muqdisho (Halqaran.com) – 5 ruux oo la rumeysan yahay inay ka tirsan yihiin Al-Shabaab oo uu ku jiro hal hoggaamiye ayaa lagu diley duqeyn ay si wadajir ah uga fuliyeen dowladaha Mareykanka iyo Soomaaliya agagaarka Saaxa-weyne khamiistii.
Sida laga soo xigtay Taliska Mareykanka ee Afrika, ma jiro qof rayid ah oo wax ku noqday ama ku dhintay howlgalkaas dartiis.
“Duqeyntan waxaa lala beegsaday hoggaamiyeyaal caan ah oo ka tirsan Al-Shabaab kuwaasoo fududeeyay maaliyadda, hubka, dagaalyahannada, iyo waxyaabaha qarxa” ayaa lagu yiri warka kasoo baxay taliska.
“Mid ayaa looga shakisan yahay inuu ku lug lahaa weerar hore oo ka dhan ahaa ciidamada Mareykanka iyo kuwa Soomaaliya,” ayuu yiri Maj. Gen. Dagvin Anderson.
Toddobaadkii hore laba duqeyn cirka ah ayaa lagu dilay saddex xubnood oo ka tirsan kooxda xagjirka ah waxaana lagu burburiyey lix dhisme oo ku yaal xaruntooda.
Madaxweynaha xilka ka sii dhammaanaya ee Donald Trump ayaa bishii December amar ku bixiyay in laga saaro Soomaaliya ilaa 800 oo askari, tallaabadaas oo la filayo in la dhammaystiro markii Madaxweynaha la doortay Joe Biden la caleemo saaro dhammaadka bishan.
Xafiiska Wararka Halqaran.com
Halqarannews@gmail.com
