Muqdisho (Halqaran.com) – Kulamo gaar-gaar ah oo khadka Internet-ka ah ayaa maanta dhexmaray Ergeyga Qaramada Midoobay ee Soomaaliya, James Swan, Wasiirka Arrimaha Gudaha, Federaalka iyo Dib u Heshiisiinta Soomaliya Mudane Mukhtaar Xuseen Afrax, iyo Madaxweynaha Hirshabeelle, Cali Cabdullaahi Xuseen ‘Guudlaawe.
Kulamaddaan ayaa looga hadlayay khilaafyada ka taagan maamulka Hirshabeelle iyo sidii wax looga qaban lahaa, maadaama gobolka Hiiraan ay ka jiraan xaalado ka dhan ah Madaxweyne Guudlaawe.
Wasiirka Arrimaha Gudaha Soomaaliya ayaa faahfaahin ka bixiyay dadaallada ku aadan sidii loo horumarin lahaa xaaladda Ammaanka iyo dib u heshiisiinta maamulka Hirshabeelle iyo sidoo kale kulamadii uu la yeeshay waxgaradka Hiiraan.
Ergeyga Qaramada Midoobay waxa uu carrabka ku adkeeyay muhiimadda uu leeyahay wadahadal dhammaan daneeyayaashu ay qeyb ka noqdaan si loo helo dib u heshiisiin ka dhacda Hirshabeelle, isagoo intaa ku daray in Qaramada Midoobay ay diyaar u tahay in ay taageerto dadaallada nabadda.
Xafiiska Wararka Halqaran.com
Halqarannews@gmail.com
