Garoowe (Halqaran.com) – Madaxweynaha dowlad goboleedka Galmudug, Axmed Cabdi Kaariye (Qoorqoor), ayaa xalay Magaalada Garoowe ku kulansiiyay Madaxweynihii hore ee Soomaaliya, Mudane Shariif Sheekh Axmed iyo Ra’iisal Wasaare Ku-xigeenka Dalka, Mahdi Maxamed Guuleed (Khadar).
Kulankan ayaa ahaa mid is arag uun ah, sida laga soo xigtay masuuliyiin ka tirsan Xafiiska Madaxweyne Qoorqoor.
Gudoomiyaha Madasha Xisbiyada Qaran, Shariif Sheekh Axmed, Ra’iisal Wasaare Ku-xigeenka iyo masuuliyiinta kale ee Garoowe ku sugan ayaa magaaladaasi uga qaybgalaya Shirka Madasha Aragti Wadaagga Sanadlaha ee Machadka Heritage.
Shirka Madasha Heritage oo sanad kasta dibadda lagu qaban jiray ayaa sanadkan ka qabsoomaya dalka, iyadoona maanta lagu wado in uu ka furmo Magaalada Garoowe.
Madaxda Dowlad Goboleedyada, marka laga reebo Madaxweyne-yaasha Hirshabelle iyo Koonfur Galbeed ayaa ku sugan Garoowe. Sidoo kale waxaa ku sugan Midowga Musharraxiinta, marka ay dhanka Dowladda Federaalka noqotana waxaa ku sugan Guddoonka Labada Aqal iyo Ra’iisal Wasaare Ku-xigeenka Xukuumadda.
Mahdi Maxamed Guuleed ayaa noqonaya masuulkii ugu sareeyay ee Villa Soomaaliya ka tirsan oo la kulma garabka mucaaradka, ka dib khilaafka xoogan ee hareeyay doorashooyinka.
Xafiiska Wararka Halqaran.com
Halqarannews@gmail.com
