Dhuusamareeb (Halqaran.com) – Xildhibaannada Baarlamaanka Dowlad Goboleedka Galmudug oo Arbacadii maanta kulan aan caadi aheyn ku yeeshay Magaalada Dhuusamareeb ayaa waxaa ay cod aqlabiyad leh ku ansixiyeen Sharciga dhismaha ciidamada Booliska Galmudug..
Sharcigaan ayaa waxaa Baarlamaanka Galmudug u gudbiyay Wasaaradda Amniga Galmudug, waxaana ay uga mahadcelisay sharcigaan oo lagu dhisayo Ciidamo boolis ah oo suga amniga deegaannada Galmudug.
War ka soo baxay Wasaaradda amniga ee maamulka Galmudug ayaa lagu yiri, “Wasaaradda Amniga Gudaha Galmudug waxay u mahadcelinaysaa Guddoomiyaha Barlamaanka Galmudug Dr. Maxamed Nuur Gacal, Guddiga Amniga iyo Xuduudaha iyo xildhibaanada Baarlamaanka Galmudug oo maanta si aqlabiyad ah ku ansixiyey Sharciga dhismaha ciidamada Booliska Galmudug.‘‘
Ugu dambeyn, 13-kii bishaan Oktoobar ayaa Wasaaradda Amniga Galmudug ay Baarlamaanka u gudbisay Sharciga dhismaha Ciidamada Booliska Galmudug si loo helo Ciidamo boolis ah oo Galmudug gaar u leedahay kana qeyb qaata sugida amniga deegaannada Galmudug.
Xafiiska Wararka Halqaran.com
Halqarannews@gmail.com
