Muqdisho (Halqaran.com) – Madaxtooyada Soomaaliya waxaa markale dib uga bilowday Shirkii u dhaxeeyay Madaxweyne Farmaajo iyo Madaxda dowlad goboleedyada iyo guddoomiyaha gobolka Banaadir.
Waxaa 24-kii saac ee la soo dhaafay Madaxda kala duwan ee shirka ka qeyb galeysa waxaa ay ku jireen fasax si ay la tashiyo ula soo sameeyeen dhinacyada kale, balse dib la isugu soo laabtay si looga doodo arrimaha doorashada.
Wararka ayaa sheegaya, in Shirka oo xalay dib u bilaawday ay ku biireen guddoomiyaha Golaha Shacabka Maxamed Mursal Sheekh Cabdiraxmaan iyo sii-hayaha xilka Ra’iisul Wasaaraha Mahdi Maxamed Guuleed (Khadar).
Sidoo kale, Wararka ayaa intaasi ku daraya in dhammaan Madaxda Dowlad goboleedyada ay ku adkeysanayaan qodobada qaar ee doorashada sida in la sameeyo guddi doorasho oo ah heer federaal iyo Heer Dowlad Goboleed, in deegaannada doorashada ka dhaceyso ka badan 2 xarumood, in aan doorashada lagu gelin xisbiyo iyo in Ergooyinka aysan ka badan 101 illaa 150 ergo.
Khamiista Maanta ah ayaa la filayaa in shirka uu halkiisa ka sii socdo, waxaana shirkaasi isha ku haya saamileyda siyaasadeed ee dalka, Shacabka Soomaaliyeed iyo Xubnaha Beesha Caalamka ee taageerada siiya Soomaaliya.
Xafiiska Wararka Halqaran.com
Halqarannews@gmail.com
