Ankara (Halqaran.com) – Ra’iisul Wasaarihii hore ee Soomaaliya, Xasan Abshir Faarax ayaa Axadda maanta ah ku geeriyooday dalka Turkiga, sida uu warbaahinta Qaranka u xaqiijiyay Wasiirka Warfaafinta Maxamed Cabdi Xayir Maareeye.
Marxuum Xasan Abshir Faarax ayaa muddooyinkii dambe xannuunsanaa, waxaana lagu daweynaayay Magaalada Ankara ee dalka Turkiga oo uu maanta ku geeriyooday.
Sidoo kale, Safiirka Soomaaliya ee dalka Turkiga, Danjire Jaamac Cabdullaahi Maxamed ayaa xaqiijiyay geerida ku timid Ra’iisal Wasaarihii hore ee Soomaaliya AUN Xasan Abshir Faarax.
Safiirka ayaa sheegay in muddooyinkii ugu dambeysay uu marxuumka ku xanuunsanaa dalkaasi Turkiga, haba ugu darnaatee labadii toddobaad ee la soo dhaafay, isagoo intaasi raaciyay in dhakhaatiirta caafimaadka ay ku soo wargeliyeen in wadnaha uu istaagay Ra’iisal Wasaarihii hore ee Soomaaliya.
Allaha u naxariisto, Xasan Abshir Faarax ayaa Ra’iisul Wasaare ka soo noqday Dowladii Madaxweyne Cabdi Qaasim Salaad Xasan.
Sidoo kale, marxuum Xasan Abshir ayaa waqti dheer ahaa Duqa magaalada Muqdisho xilligii Kacaanka, wuxuu kaloo soo noqday xubin Baarlamaan.
Madaxda Dowladda Federaalka ah Soomaaliya ayaa ka tacsiyaysay geerida Ra’isul Wasaarihii hore ee Soomaaliya Xasan Abshir Faarax.
Xafiiska Wararka Halqaran.com
Halqarannews@gmail.com
