Muqdisho (Halqaran.com) – Wararka ka imaanaya duleedka Magaalada Muqdisho, gaar ahaan deegaanka Garasbaaley, ayaa sheegaya in darbi uu ku soo dumay dad barakacayaal ah, waxaana ka dhashay Khasaare dhimasho iyo dhaawacba leh.
Xero lagu magacaabo Malable oo ku taallo deegaanka Garasbaaley una dhaw goob dhismo hore darbi ah ayaa waxaa dhacday inuu soo dumay darbigii, kadibna carruurta ay ku geeriyoodaan.
Saddex carruur oo jiiftay iyo gabar yar ayaa ku dhimatay darbigaasi soo dumay, waxaa dhaawac uu soo gaaray qof kale sida goobjoogayaasha ay Warbaahinta gudaha u xaqiijiyeen.
Dadkaan oo Barakacayaal ahaa ayaa saameyn adag waxaa ku yeeshay roobabkii ka da’ay Magaalada Muqdisho iyo deegaannada ku xeeran.
Xilliyada roobka ayaa waxaa saameyn adag uu ku yeeshaa dadka masaakiinta Barakacayaasha oo degan goobo cariishado ka sameysan, taasi oo ay u sii dheer tahay in xilliyada qaar darbiyada sidaan oo kale ugu soo dumaan.
Weli kama aysan hadlin maamulka Garasbaaley arrintaan, balse dadka degan Kaamka ayaa ku mashquulsan sidii aas loogu sameyn lahaa carruurta.
Xafiiska Wararka Halqaran.com
Halqarannews@gmail.com
