Kismaayo (Halqaran.com) – illaa iyo 30 carruur ah ayaa lagu soo warramayaa in saacadihii la soo dhaafay xaalad nafaqo darro ah ugu geeriyootay Isbitaalka magaalada Kismaayo ee gobolka Jubbada hoose.
Carruurtaan ayaa waxaa laga kala keenay qaar kamid ah deegaannada iyo degmooyinka Gobolada Jubbooyinka, gaar ahaan degaannada ay maamulaan Al-Shabaab, waxana saameyn weyn ku yeeshay xaaladda abaareed ee kajirta deegaannada Jubbaland.
Madaxa qaybta Nafaqo-darrada ee Isbitaalka Kismaayo Faysal Aadan Ibraahim oo la hadlay laanta Af Soomaaliga ee VOA-da ayaa sheegay in dad gaaraya ilaa 400 oo Ruux oo kamid ah dadka ay sameysay abaarta ee ka qaaday xanuuno kala duwan haatan lagu daweeynayo isbitaalka Magaalada kismaayo.
Wuxuu intaasi raaciyay Feysal, in xaaladda nafaqa darro ee heysata Carruurta ku nool degaannada Gobolada Jubbooyinka ay yihiin kuwo aad u daran ayna siweyn u saameysay abaarta, sidoo kalena ay jiraan kuwo badan oo weli ka barakacaya.
Si kastaba, deegaanno iyo degmooyin katirsan Gobollada Jubbooyinka ayaa waxa weli kajirta abaar daran, waxaana ay siweyn u saameysay dad iyo duunyo, iyada oo dowladda Maamulka Jubbaland iyo Hay’adaha samafalka ay ka gaabiyeen wax u qabashadooda.
Xafiiska Wararka Halqaran.com
Halqarannews@gmail.com
