Muqdisho(Halqaran.com) –Wasiirka amniga Cabdullaahi Maxamed Nuur ayaa shaaciyay inay soo gaartay Cabasho ah in Ciidanka Booliska ay dhibaato u geysteen mas’uuliyiin iyo dad shacab ah oo Maanta Banaanbax looga soo horjeeday Farmaajo ka dhigay Muqdisho.
Wasiir Cabdullaahi Maxamed Nuur oo Qoraal soo saaray ayaa waxaa uu ku sheegay in baaritaano lagu sameeyn doono sida ay wax u dhaceen oo shacabka looga hor istaagay banaanbixii ay Maanta ka dhigayeen xaafaddo ka tirsan degmada Hodan.
“Waxaa isoo gaartay Cabasho ah in hay’adaha Amniga gaar ahaan booliska dalku wax yeelo u gaysteen mas’uuliyiin iyo shacab ka qayb gelayay isu soo bax nabadeed waxaana lagu samayn doonaa baaritaan sida ay wax u dhaceen” ayuu yiri Wasiirka amniga Xukuumadda Federaalka.
Sidoo kale Wasiir Cabdullaahi Maxamed Nuur aya yiri “Waxaan shacabka iyo mas’uuliyiintaas u xaqiijinayaa in aan marna la aqbali doonin in saraakiisha hay’adaha amniga ku kacaan falalka lagu soo eedeeyay. Waxaan sidoo kale shacabka ugu baaqayaa in ay is dejiyaan lana ilaaliyo xasiloonida Caasimada mana la aqbali karo wax rabshada ah” ayuu kusoo gaba-gabeeyay Qoraalkiisa Wasiir Cabdullaahi.
Warkaan kasoo baxay Wasiirka Wasaaradda Amniga Cabdullaahi Maxamed Nuur ayaa yimid kadib markii Siyaasiga Cabdiraxmaan Cabdishakuur & Wasiirkii hore ee Amniga Axmed Macalin Fiqi ay sheegeen in Taliye kuxigeenka Ciidanka Booliska Kaniif & Taliyaha Booliska Gobolka Banaadir Farxaan Qaroole joojiyeen dibadbax lagu taageerayay Ra’iisul Wasaare Rooble.
Xafiiska Wararka Halqaran.com
Halqarannews@gmail.com
