Gaalkacyo (Halqaran.com) – Waxaa weli maalintii Afaraad xiran Suuqa Ganacsiga ee magaalada Gaalkacyo, gaar ahaan qeybta Waqooyi.
Suuqaani ayaa xiran maalintii afaraad, kadib markii ganacsatada ay sheegeen in Wasaaradda Maaliyadda Puntland ay ku soo rogtay canshuur dheeri ah.
Ganacsatada Gaalkacyo, ayaa ka cabanaya canshuurta iibka, taasi oo ay sheegeen in wasaaradda Maaliyadda kaga qaadi jirtay kastamyada oo keliya, haddana ay bilowday in ay mid labaad ka qaaddo xarumahooda ganacsiga ee ku yaalla magaalada.
Maalintii Khamiista ayey bilaabeen ganacsatada inay xiraan Suuqa, islamarkaana ay joojiyaan dhaqdhaqaaqa ganacsiga Magaaladaasi.
Illaa hadda ma jirto xal buuxa oo ganacsatada iyo Wasaaradda Maaliyadda Puntland ay isla garteen si dib loogu furo dhaq dhaqaaqa ganacsiga Suuqaasi.
Dadka Magaalada Gaalkacyo ayaa aad u saameyay xirnaanshaha Suuqa Ganacsiga ee Magaalada Gaalkacyo, maadaama dadka ay ku tiirsanaayeen ganacsiga Suuqaasi.
Xafiiska Wararka Halqaran.com
Halqarannews@gmail.com
