Volkmarsen (Halqaran.com) – Nin gaari watay ayaa galabta beegsaday dad isugu soo baxay munaasabad ka socotay Magaalada Volkmarsen ee dalka Jarmalka.
In ka badan 10 ruux oo ka mid ahaa dadkii halkaasi isugu soo baxay ayaa ku dhaawacmay falkaasi, sida ay xaqiijiyeen Saraakiisha Booliska Jarmalka.
Gaadiidka gurmadka deg-dega oo ku baxay goobta uu falku ka dhacay ayay shaqaalaha caafimaadka ugu gurmadeen dhibane-yaasha, oo ay u qaadeen goobaha caafimaadka.
Sarkaal Booliska magaalada Volkmarsen u hadlay ayaa xaqiijiyay in gacanta lagu soo dhigay qofkii falkaasi ka dambeeyay, iminkana uu ku jiro gacanta hay’adaha ammaanka.
Ilaa iyo hadda ma cadda ujeedada rasmiga ah ee weerarkan, mana jirto wax tafaasiil ah oo boolisku ay ka bixiyan, marka laga soo taggo in gacanta lagu hayo.
Weerarkan ayaa noqonaya kii ugu horreeyay oo ka dhaca magaaladan yar oo ku taala Gobolka Hesse ee bartamaha dalka Jarmalka.
Kala soco wixii faah-faahin ah ee ku soo kordha Halqaran.com
Xafiiska Wararka Halqaran.com
Halqarannews@gmail.com
