Muqdisho (Halqaran.com) – Afhayeenka ciidanka booliska Soomaaliyeed ayaa ka warbixiyay dilkii magaalada Muqdisho loogu geystay Cismaan Salaad Daahir oo ku magac dheer (Atooraha badda) oo ka mid ahaa dadka sida weyn loogu yaqaano baraha bulshada.
Afhayeenka ciidanka booliska Soomaaliyeed ayaa beeniyay in dilkaasi ay ka dambeeyeen kooxo hubeysan, balse waxaa uu sheegay in uu dilay Atooraha badda nin saaxiibkiisa ah oo lagu magacaabo Leeflefow.
“Atooraha Badda Dilkiisa waxaa qirtay saaxiibkiis Leeleefoow oo muran lacageed uu soo kala dhex galay” ayuu yiri afhayeenka ciidanka booliska oo warbaahinta la hadlay.
Wararka ay helayso Warbaahinta HalQaran News ayaa sheegaya, in ninkaan dilka geystay uu la shaqeyn jiray Atooraha badda, waxaana uu la jili jiray filimaanta, waxaana la sheegay in muran lacag dad muxsiniin ah ay soo direen oo dhan Lix kun oo dollar ay ku dagaallameen.
Afhayeenka ciidanka Booliska Soomaaliyeed ayaa sheegay in kiiskaan uu marin habaabiyay ninkii dilka geystay, balse ugu dambeyntii uu qirtay haddana uu ku jiro gacanta hay’addaha Ammaanka.
Marxuum Cismaan Salaad Daahir (Atooraha Badda) ayaa ka mid ahaa Ciidanka Booliska Soomaaliyeed, waxaana sidoo kale uu ka mid ahaa dhallinyarada sida weyn looga garanayo caasimadda Muqdisho.
Sidoo kale, waxaa lagu xasuustaa marxuuka caawinta iyo u gar-gaaaridda dadka danyarta ah, baraha bulshadana ka soo muuqan jiray isagoo ku guda jira howlo samafal ah.
Xafiiska Wararka Halqaran.com
Halqarannews@gmail.com
