Hargeysa (Halqaran.com) – Wararka naga soo gaaraya magaalada Hargeysa ayaa sheegaya, in ciidamo ka tirsan booliska Somaliland ay la wareegeen xaruntii dhexe ee Xisbiga Waddani ee magaalada Hargeysa.
Xisbiga mucaaradka ee Somaliland oo isla caawa arrintaasi ka hadlay ayaa durba dalbaday in ciidanka si dhaqsi ah looga saaro xarunta xisbiga Waddani ee Hargeysa.
Afhayeenka guud ee Xisbiga Waddani Barkhad Jaamac Batuun ayaa ciidanka booliska Somaliland xabsiga u taxaabay, kaddib markii uu galabta maanta markale ku baaqay Banaanbax uu iclaamiyay guddoomiyaha xisbiga Waddani Cabdiraxmaan Cirro.
Taliyaha Booliska Somaliland Maxamed Aadan Saqadhi (Dabo-gale), ayaa sheegay in aanay aqbalayn bannaanbaxyo ay sameeyaan taageerayaasha xisbiga Waddani oo isniinta berri ka dhaca magaalada Hargeysa.
Ugu dambeyn, taliyaha ayaa ugu baaqay hoggaanka Xisbiga Wadani in uu ka laabto Banaabaxa, islamarkaana berri ay qaadi doonaan Mas’uuliyadda wixii ka dhasha Banaanbaxyo ka dhacay Hargeysa.
Xafiiska Wararka Halqaran.com
Halqarannews@gmail.com
