Muqdisho (Halqaran.com) – Aqalka Madaxtooyada Qaranka ayaa lagu qabtay 60 sano guuradii ka soo wareegatay Xornimada Gobolada Koonfurta, israacii iyo midowgii Gobolada Koonfurta & Waqooyiga Soomaaliya.
Madaxweynaha Jamhuuriyadda Soomaaliya, Maxamed Cabdullaahi Farmaajo ayaa ka qaybgalay Munaasabadda 1-da Luulyo, oo sanadkan lagu qabtay Xarunta Villa Somaaliya.
Madaxweynaha ayaa salaan sharaf ka qaatay cutubyo ka tirsan Ciidanka Xoogga Dalka, intii Calan-saarka ay ka socotay Madaxtooyada Magaalada Muqdisho.
Qoraal lagu daabacay barta Villa Soomaaliya ku leedahay shabakadda bulshada wada xiriiriso ee Facebook ayaa lagu sheegay in Madaxweynaha uu Arbacada maanta jeedin doono khudbadda uu ugu talagalay Munaasabadda 1-da Luulyo.
1-da Luulyo ayaa saqdii dhexe ee xalay laga xusay Magaalooyinka Gaalkacyo, Cadaado, Dhuusamareeb, Muqdisho, Baydhabo, Kismaayo iyo magaalooyin kaloo dalka ka tirsan.
Xafiiska Wararka Halqaran.com
Halqarannews@gmail.com
