RW Xamse oo si kulul uga hadlay Qaraxyadii maanta ka dhacay Isgoyska Zoobe

Muqdisho (Halqaran.com) – Ra’iisul Wasaaraha XF Soomaaliya, Mudane Xamse Cabdi Barre, ayaa si kulul u cambaareeyay weerarka naf lacaariga ah ee argagixisada ay ku beegsadeen maanta dadka maatida ah.

Mr Barre ayaa sheegay, in aanu marnaba niyad jabin doonin kacdoonka Shacabka Soomaaliyeed iyo dagaalka ay Dowladda Soomaaliya hormuudka ka tahay ee lagu ciribtiraayo Ururka Al-Shabaab.

Ra’iisul Wasaare Xamse ayaa ALLE (SWC) uga baryay inuu Jannatul Fardowsa ugu deeqo dhammaan shacabkii Soomaaliyeed ee Shuhaddada ahaa ee maanta Al-Shabaab ku laayeen Magaalada Muqdisho.

Ra’iisul Wasaaruhu waxa uu sheegay in qaraxyada maanta dhacay ay tusaale u yihiin hadafka guud ee Argagixisada Al-Shabaab oo ah inay baabi’iyaan ummadda Soomaaliyeed, iyaga oo aan kala sooceyn carruur, dhallinyaro, haween iyo waayeel intaba.

Ugu dambeyn, Ra’iisul Wasaaraha Xukuumadda Federaalka ah ee Soomaaliya ayaa markale ku celiyay in Xukuumadda ay ka go’an tahay sidii loo dabargoyn lahaa kooxda argagixisada ee gabalkoodu sii dhacayo, isagoo shacabkana ugu baaqay in si wadajir ah la isaga kaashado ka hortagga dhagarta ay maleegayaan.

Xafiiska Wararka Halqaran.com
Halqarannews@gmail.com