Balcad(Halqaran.com) – Ra’iisul Wasaare Maxamed Xuseen Rooble oo safar shaqo u Tagay degmada Balcad ee Gobolka Shabelladha Dhaxe ayaa booqday Isbitaalka guud ee Balcad iyo qeybo ka mid ah magaalada oo ay ka mid yihiin buundada Iyo suuqa degmada Balcad.
Rooble waxaa kormeerkiisa ku wehlinayay madaxweynaha Maamulka Hirshabeelle, Cali Guudlaawe Xuseen iyo Taliyaha Booliska Soomaaliya, taliyaha booliska Gobolka Banaadir, Taliyaha KMG ah ee NISA iyo saraakiil kale oo socdaalka qayb ka ahaa.
Wafdiga uu Rooble hoggaminayay ayaa waxay ay la kulmeen maamulka iyo howl-wadeennada Isbitaalka, iyagoo kala sheekeystay baahiyaha halkaasi ka jira iyo sida ay howluhu u socdaan.
Ra’iisulwasaare Maxamed Xuseen Rooble ayaa sidoo kale soo indha-indheeyay Buundada dhexmarta Magaalada, isagoo u kuurgalay goobaha ugu halista badan ee uu fatahaadda ka sameeyo Webiga Shabeelle.
Degmada Balcad ayaa ka mid ah degmooyinka ugu Quruxda badan Maamulka Hir-shabelle Waxay qiyaastii 36 kiiloomitir waqooyi bari ka xigtaa magaalada caasimadda ah ee Muqdisho.
Xafiiska Wararka Halqaran.com
Halqarannews@gmail.com
