Hargeysa (Halqaran.com) – Madaxweynaha Somaliland, Mudane Muuse Biixi Cabdi oo uu wehelinaayo Madaxweyne Ku-xigeenka Somaliland, Cabdiraxmaan Cabdilaahi Ismaaciil (Saylici) ayaa Isniintii maanta Qasriga Madaxtooyada kulan kula qaatay Gudoomiyeyaasha Xisbiyada Mucaaradka ee UCID iyo WADDANI, Faysal Cali Waraabe iyo Cabdiraxmaan Maxamed Cabdilaahi (Cirro), waxana kulankaasi lagaga wada hadlay arrimo badan oo la xiriira xaaladda guud ee dalka.
Kulanka Madaxweynaha iyo Gudoomiyeyaasha Xisbiyada UCID iyo WADDANI ayaa diirrada lagu saaray:
In si wada jira ay hoggaanka axsaabta qaranka uga wada shaqeeyaan waqtiga ugu suurta galsan ee doorashadu ku qabsoomi karto.
In sadexda xisbi qaran ka hawl galaan dhammaystirka caqabadaha ku gedaaman qabsoomidda doorashooyinka goleyaasha wakiillada iyo deegaanka.
In si wada jira sadexda xisbi qaran u guda-galaan soo jeedintii odayaasha ee arrimaha doorashada.
Madaxweynaha iyo Guddoomiyayaasha Xisbiyada Mucaaradku waxay kulankooda iskula garteen inay wadatashi kula noqdaan Xisbiyadooda, iyaga oo u ballamay kulamo dambe oo arrimahan lagu sii gorfayn doono.
Xafiiska Wararka Halqaran.com
Halqarannews@gmail.com
