Dhuusamareeb (Halqaran.com) – Wasiirkii Amniga Maamul Goboleedka Galmudug Axmed Macalin fiqi ayaa iska casilay xilkii uu ka hayay maamulkaasi, waxaana sidoo kale uu shaaciyay sababta rasmiga ah ee ka dambeysay inuu is casilo, xilli xaaladda Maamulkaasi Galmudug ay gashay waji cusub oo u eg saan-saan dagaal.
Fiqi, oo sidoo kale ah xildhibaan ka tirsan Golaha Shacabka, ayaa qoraal uu soo dhigay facebook ku yiri “Maantay waxaan madaxweynaha Galmudug u gudbiyey iska casilaadaydii xilka wasiirka amniga Galmudug, ka dib markii aan isla fahmi weynay qaabka loo wajahayo khilaafka isaga iyo Ahlu suuna u dhexeeya.”
Waxaa uu intaas ku daray Axmed Macalin Fiqi in Madaxweyne Axmed Cabdi Kaariye Qoorqoor uu Ciidamo farabadan ka daadgureeyay Muqdisho, si uu ugu weeraro Ahlu-Sunna, kuwaasi oo sida uu sheegay aan lagala tashan Wasaaraddiisa oo arrimaha amniga Galmduug ku shaqo leh. ”asagoo adeegsanaya ciidamo Muqdisho laga soo daadgureeyey kuwaasoo wax talo ah aysan ku lahayn masuuliyiinta wasaarada , aniguna aan u soo jeediyey wadada wadahadalka iyo dagaal la’aantu in ay ka sahlan tahay, ka dhib yar tahay, kana guul badan tahay middaas” ayuu yiri Wasiirka iscasilay ee Galmudug.
Xildhibaan Fiqi ayaa sheegay inuu qaban doono shir jaraa’id oo u uku faah-faahinayo xaaladda cakiran ee Galmudug ka taagan, fariinna uu ugu diri doono waxgaradka Galmudug.
Xafiiska Wararka Halqaran.com
Halqarannews@gmail.com
