Garoowe(Halqaran.com) –Madaxweynaha dowlad goboleedka Puntland Siciid Cabdullaahi Deni, ayaa maanta kulan gaar ah la qaatay saraakiisha ciidanka difaaca Puntland ee Daraawiishta, waxaana kulanka looga hadlay arrimo dhowr ah oo la xirrira amniga guud ee deegaannada maamul goboleedka Puntland.
Ugu horreyn Saciid Cabdullaahi Deni ayaa warbixin ka dhegaystay Taliyaha Ciidanka difaaca Puntland ee Daraawiishta Gen Yaasiin Cumar Dheere iyo Saraakiisha kale ee Ciidanka oo ka qeybgalay, iyaga oo la wadaagay howlgalada amni iyo qorsheyaasha ay ku horumarinayaan.
Madaxweyne Saciid Deni ayaa “Ciidanka ku boggaadiyay sida geesinimada leh ee ay marwalbo heegan ugu yihiin difaaca Puntland, oo ay uga difaacayaan argagixisada iyo cidkasta oo amni daro ka shaqeynaysa, wuxuuna faray in ay sii laba jibaaraan gudashada waajibaadkooda.” Ayaa lagu sii yiri qoraalka ka soo baxay Madaxtooyada.
Sido kale Madaxweynaha dowlad Goboleedka Puntland Siciid Cabdullaahi Deni ayaa kulan kale isla Maanta la qaatay saraakiisha ciidanka Asluubta ee Maamulka Puntland.
Madaxweynaha ayaa ka dhegaystay Saraakiisha warbixin ku saabsan shaqada socota, gaar ahaan xaaladda Xabsiyada, iyo maxaabiista, wuxuuna faray in ay sii dardargeliyaan shaqada ay bulshada u hayaan.
Xafiiska Wararka Halqaran.com
Halqarannews@gmail.com
