Dhuusamareeb (Halqaran.com) – Madaxweynaha dowlad goboleedka Galmudug, Axmed Cabdi Kaariye (Qoorqoor) ayaa ku dhawaaqay howgal ka dhan ah Ururka Al-Shabaab oo dhawaan Ciidanka dowladda Soomaaliya iyo kuwa Galmudug ay ka bilaabi doonaan deegaannada ay gacanta ku hayaan Al-Shabaab.
Qoorqoor ayaa xalay ku booqday Ciidanka Xoogga Dalka Soomaliyeed Qeybta 21aad deegaanno ay ka socdaan howlgalo lagula dagaallamaayo maleeshiyaadka Al-Shabaab.
Madaxweynaha Galmudug ayaa xusay in deegaannada ay kaga sugan yihiin Al-Shabaab Galmudug in dhawaan lagala wareegi doono, islamarkaana ay diyaariyeen qorshihii lagu qabsan lahaa.
Sidoo kale wuxuu xusay, in Galmudug ay diyaarisay ciidan ku filan dagaalka Al-Shabaab, kaddib markii uu dhawaan tababar u soo xiray ku dhawaad 500 oo askari.
Ururka Al-Shabaab ayaa gacanta ku haya degmooyin ku yaala gobollada Mudug iyo Galgaduud.
Xafiiska Wararka Halqaran.com
Halqarannews@gmail.com
