Jowhar (Halqaran.com) – Madaxweynaha dowlad goboleedka Hirshabeelle, Cali Guudlaawe Xuseen oo uu wehliyo Madaxweyne Ku-xigeenka Maamulkaas Yuusuf Axmed Hagar ayaa Arbacadii maanta ka furay Magaalada Jowhar kalfadhiga 3aad Baarlamaanka 2aad ee Hirshabeelle.
Munaasabada furitaanka Kalfadhiga 3aad ee Baarlamaanka waxaa ka qeybgalay Wasiirro Salaadiin iyo qeybaha kala duwan ee bulshada magalada Jowhar.
Madaxwaynaha oo jeedinayay khudbadda dastuuriga ah ee furitaanka kalfadhiga 3aad ee baarlamaanka ayaa ka hadlay xaaladaha guud ee amaanka, howlgalada qorsheysan ee ka dhanka ah Al-Shabaab, Arrimaha dib u heshiisiinta, horumarinta dhaqaalaha, kobcinta dakhliga gudaha, dhameystirka golayaasha deegaanka ee degmooyinka Hirshabeelle iyo dhismaha golaha cusub ee wasiiradda Hirshabeelle oo maalmaha soo socda la magacaabi doono.
Madaxweynaha Hirshabeele ayaa Guddoonka iyo Mudanayaasha Baarlamaanka uga mahadceliyay gudashada waajibaadkooda dastuuriga ah waxa uuna ka dalbaday inay xoojiyaan u shaqeynta bulshada iyo la xisaabtanka Xukuumadda.
Xafiiska Wararka Halqaran.com
Halqarannews@gmail.com
