Muqdisho (Halqaran.com) – Madaxweynaha JF Soomaaliya, Mudane Maxamed Cabdullaahi Farmaajo ayaa markale khadka taleefanka kula hadlay Madaxweynaha Turkiga, Recep Tayyip Erdoğan.
Farmaajo ayaa qoraal uu soo dhigay bartiisa Twitter-ka waxaa uu ku sheegay in ay wada hadleen Madaxweynaha Turkiga.
Sida uu sheegay Madaxweynaha Soomaaliya waxaa uu dhigiisa Turkiga kaga mahadceliyay hiilka walaaltinimo iyo agabka caafimaadka, ee ay sida deg-degga ahi ugu soo direen dalka.
“Waxaan wada hadalnay Madaxweynaha Turkiga, Mudane Recep Tayyip Erdogan. Aniga oo uga mahadceliyay hiilka walaaltinnimo iyo agabka caafimaad, ee ay sida deg-degga ah noogu soo direen.” Ayuu yiri Madaxweyne Farmaajo.
Madaxweyne Farmaajo ayaa sheegay in taageerada Xukuumadda Ankara, ay kaalin weyn ka gaysanayso ka hortagga iyo la dagaalanka xanuunsidaha COVID-19, ee uu keeno Coronavirus.
“Gargaarkan wuxuu kaalin mug leh ka gaysanayaa ka hortagga iyo la dagaalanka cudurka COVID-19.” Ayuu yiri Madaxweynaha Jamhuuriyadda Somaliya.
Bisha Cas ee Turkiga ayaa Xukuumadda Soomaaliya ka gacan siineysa la dagaallankeeda Cudurka Coronavirus, iyadoona uu yoolku yahay in la xakameeyo faafitaanka xanuunkaasi.
Ugu dambeyn, Turkiga waxaa lagu tilmaamaa saaxiibka ugu weyn ee ay maanta Soomaali leedahay, iyadoo dhinacyo kala duwana uu ka taageero.
Xafiiska Wararka Halqaran.com
Halqarannews@gmail.com
