Muqdisho (Halqaran.com) – Hoggaanka Madasha Xisbiyada Qaran ayaa maanta mar kale kulan la qaatay Guddoonka Golaha Shacabka oo ay ka socdeen Guddoomiye Maxamed Mursal Sheekh Cabdiraxmaan iyo ku-xigeenkiisa 1aad Cabdiweli Sheekh Ibraahim Muudeey.
Hoggaanka Madasha iyo Guddoonka Golaha Shacabka ayaa iska wareystay waxa ka qabsoomay ballamihii lagu kala qaatay kulankii u dambeeyey ee dhexmaray labada dhinac.
War kasoo baxay Madasha Xisbiyada ayaa lagu sheegay in deddaal badan ku bixinayaan soo celinta wadashaqeyntii u dhexeysay labada Aqal ee Baarlamaanka Jamhuuriyadda Federaalka Soomaaliya.
Xassan Sheekh Maxamuud Madaxweynihii siddeedaad ee dalka kana mid ah hoggaanka Madasha Xisbiyada Qaran ayaa intii uu kulanku socday ka warbixiyey kulan uu shalay la qaatay Guddoonka Aqalka Sare kaas oo qeyb ka ahaa deddaallada Madasha ee isku keenidda labada Aqalka ee Baarlamaanka.
Kulanka ayaa lagu go’aamiyey in la sii wado watashiyada lagu raadinayo isfaham la dhexdhigo guddoonka labada Aqalka ee Baarlamaanka oo khilaaf uu ka dhaxeeyo.
Xafiiska Wararka Halqaran.com
Halqarannews@gmail.com
