Boosaaso (Halqaran.com) – Dowladda Imaaraadka Carabta ayaa dowlad goboleedka Puntland waxa ay ku wareejiyeen qalab loogu talo galay ka hortaga cudurka Coronavirus (Covid-19) oo dunida si wayn u saameeyay.
Qalabkaan ayaa laga dajiyay Garoonka Diyaaradaha ee Magaalada Boosaaso, halkaasi oo masuuliyiin ka tirsan Puntland ay kula wareegeen, gaar ahaan Wasiirka Caafimaadka Puntland.
Madaxweynaha Puntland ayaa Imaaraadka uga mahadceliyay agabkaasi caafimaad ee loogu talagalay xakameynta iyo ka hortagga Coronavirus, kaasi oo Imaaraadku ugu deeqay Puntland.
“Waxaan uga mahadcelinaya Dowladda Imaaraadka gargaarka bani’aadantinimo ee ay nasoo gaarsiisay, oo maanta Boosaaso ka degay, waa agab caafimaad oo loogu talagalay xakameynta iyo ka hortagga Coronavirus.
Xilligan waxaa dagaal adduunka oo dhan kula jiraa halista Covid-19 oo si xowli ah ku fidaya, waana loo baahanyahay in la iska kaashado Ka hortagga Cudurkaasi, aad baan ugu mahadcelinaya Dowladda Imaaraadka oo agabkan nasoo gaarsiisay xilli aad loogu baahanyahay“
Xafiiska Wararka Halqaran.com
Halqarannews@gmail.com
