Muqdisho (Halqaran.com) – wasaarada Gargaarka iyo Maareynta musiibooyinka ee Xukuumadda Soomaaliya ayaa Gargaar deg deg u dirtay Magaalada Guriceel ee Gobolka Galgaduud, halkaasi oo maalmahii lasoo dhaafay uu ka dhacay dagaal qaraar oo sababay in gabi ahaan dadkii Magaaladaas ay barakacaan.
Wasiirka Gargaraka iyo Maareynta Musiibooyinka Khadiijo Maxamed Diiriye ayaa sheegtay in gargaarka oo ka kooban teendhooyin iyo maryaha kaneecada laga hoos galo uu Guriceel gaari doono maanta iyo berri oo khamiis ah.
Sido kale Galmudug ayaa looga fadhiyaa in ay dejiso qorshaha Dadkaan dib loogu celinayo Guryahooda maadaama Degmada Guriceel ay u gacan gashay Ciidamada DFS & kuwa Dowlad-Goboleedkaas, Guddoomiyaha Degmada Guriceel waxa uu Dadka ka barakacay Degmadaas ka dalbaday in ay dib ugu soo laabtaan guryahooda.
“Dadkii ka barakacay Magaaladaan waxa aan ugu baaqayaa in ay dib ugu laabtaan guryahooda, Magaaladu waa mid degen oo gacanta ciidamada Dowladda ayuu soo galay, Bulshadii la barakaciyay ee guryahooda difaaca laga qoday dib ha usoo laabtaan” ayuu yiri Guddoomiyaha Degmada Guriceel.
Dhanka kale Xaaladda Magaalada Guriceel ayaa maanta si caadi ah ku soo laabatay, waxaana waaberigii hore ee saakay ee halkaas isaga baxay Ciidankii Ahlusunna Waljamaaca ee dagaalka la galay Ciidanka dowladda iyo kuwa Maamulka Galmudug.
ugu dambeyn Khasaaro isugu jira dhimasho iyo dhaawac oo lixaad leh ayaa ka dhashay dagaaladii ka dhacay Magaalada Guriceel oo soo kala gaaray dhinacyadii dagaalamay, isla markaana waxaa xusid mudan in dadka dhintay ay ku jiraan Saraakiil Ciidan, Askar iyo dad shacab ah.
Halqarannews@gmail.com
