Muqdisho (Halqaran.com) – Warsaxaafadeed kasoo baxay AMISOM ayaa waxaa lagu sheegay inay ka walaacsan yihiin eedeynta ah in Ciidamadooda ka qeyb qaateen dagaalkii Guriceel ayna taageereen Ciidanka dowladda, isla markaana eedeymahaas ay hihiin kuwo been abuur ah oo la doonayo in khilaaf laga dhex abuuro AMISOM iyo Bulshada Soomaaliyeed
Bayaanka ayaa sidoo kale waxaa ay AMISOM ku sheegeen in marnaba aysan sina kaga qayb qaadan dagaaladii hubeysnaa ee dhiiga badani ku daatay ee dowladda iyo Ahlu Sunna Waljamaaca ku dhexmaray Guriceel.
” Hawlgallada AMISOM, oo ay ku jiraan hawlgallada milatari iyo taageerada Ciidanka DFS, waxaa haga waajibaadka ay bixiyaan Golaha Ammaanka ee Qaramada Midoobay, waxaana wax lagu fuliyaa in si adag loo dhawraa howlgallada iyo Xeerarka Hawlgelinta ayaa lagu yiri” Qoraal kasoo baxay AMISOM.
Dhawaan ayay ahayd markii hoggaanka ugu sarreeya Ahlu-Sunna ay sheegeen in Ciidanka AMISOM ay qayb ka ahaayeen dagaalkii Dowladda iyo Galmudug ay Ahlu-sunna kaga qabsadeen magaalada Guriceel oo markii hore ku dhacday gacanta Xoogagga ASWJ.
Taliska AMISOM ayaa sidoo kale xusay in ciidamadooda ay Soomaaliya u joogaan nabad ilaalin, gaar ahaan dagaalka ka dhanka ah Al-Shabaab.
Xafiiska Wararka Halqaran.com
Halqarannews@gmail.com
