Kismaayo (Halqaran.com) – Waxaa dekedda magaalada Kismaayo oo kaalin weyna ku leh dhaqdhaqaaqa ganacsiyada ee qeybo ka mid ah gobollada dalka Soomaaliya ayaa waxaa ka bilowday dhoofka xoolaha, sisinta iyo liin dhanaanta.
Maareeyaha Dekedda Kismaayo Axmed Xaaji oo la hadlay VOA-da ayaa sheegay in tallaabadaan u jeedada laga leeyahay ay tahay sidii sare loogu qaado dhaqaallaha kasoo xarooda dekedda oo maamulka Jubbaland uu ku tiirsan yahay.
Axmed Xaaji ayaa xusay in dekedda ay kusoo xirtaan maalinkii maraakiib kala duwan oo kala yimaada dalalka Khaliijka, kuwaasoo keena badeecooyin kala duwan, isagoo sheegay in ay tahay markii ugu horreysay oo dekedda Kismaayo ay laga dhoofinaayo xolaha.
Sidoo kale, Maareeyaha Dekedda Kismaayo ayaa xusay, in ay fursad u tahay ganacsatada deegaanada maamulka Jubbaland oo dhibaato u mari jiray si ay u dhoofiyaan xoolaha.
Waxay noqoneysaa markii ugu horeeysay tan iyo burburkii dowladdii dhexe ee Soomaaliya ee dhoofin noocan ah ay sameysay dekedda Kismaayo.
Dekedda ayaa waxaa subax kasta u shaqa taga shaqaalo ka badan afar kun oo qof oo xoogsato u badan.
Xafiiska Wararka Halqaran.com
Halqarannews@gmail.com
