Daynuunay (Halqaran.com) – Wararka naga soo gaaraya Gobolka Bay ayaa sheegaya in dagaal cusub uu ka dhacay deegaanka Daynuunay oo fariisin ay ku leeyihiin ciidanka Dowladda Federaalka Soomaaliya.
Dagaalka ayaa waxa uu billowday, kaddib markii Al-Shabaab ay weerar ku qaadeen fariisimaha ciidanka, waxaana jira khasaare dhimasho iyo dhaawac oo labada dhinac ka soo gaaray iska hor-imaadka.
Ciidanka Dowladda ayaa illaa iyo hadda la xaqiijiyay inay ka dhaawacmeen saddex askari.
Ururka Al-Shabab ayaa iyana la rumaysan yahay inuu khasaare dhankooda ka soo gaaray dagaalka, inkastoo aan si rasmi ah loo ogayn tirada khasaaraha soo gaaray .
Dad goobjoogayaal madax-banan oo Daynuunay ku sugan ayaa xaqiijinaya in ciidanka Dowladda ay ka baxeen xerada, waxaana gacan ku haynta goobta la wareegtay Maleeshiyaadka Kooxda Al-Shabaab.
Al-Shabaab ayaa maalmihii ugu dambeeyay waxay isku uruursanayeen duleedka deegaanka Daynuunay ee gobolka Baay. Lama oga inay ka baxayaan xerada Daynuunay iyo inay sii joogayaan.
Ugu dambeyn, Ciidanka Dowladda Soomaaliya ayaa lagu soo warramayaa inay wadaan daddaallo ay dib ugu laabanayaan fariisinka xerada Daynuunay oo 25 kilomitir u jirta magaalada Baydhabo.
Xafiiska Wararka Halqaran.com
Halqarannews@gmail.com
