Dhuusamareeb (Halqaran.com) – Ciidamada dowladda Federalka Soomaaliya oo si buuxda ula wareegeen gacan ku haynta Xarunta Inji ee Magaalada Dhuusamareeb, ayaa sawirro laga soo qaaday xaruntaasi ay muujinayaan Bur bur xooggan oo xaruntaasi ka muuqda.
Dagaalkii shalay oo dhan ka socday Xarunta Inji ayaa sababay Bur burkaasi iyo sidoo kale madaafiicdii lagu garaacay xarunta intii dagaalka uu socday.
Madaxdii Ahlu Sunna ee ku sugnaa goobta ayaa waxaa ay isku dhiibeen Ciidan uu hoggaaminaayay Jeneraal Mascuud, waxaana wararka ay sheegayaan in loo kaxeeyay dhanka hoyga Madaxweyne Axmed Cabdi Kaariye Qoor qoor.
Lama oga tallaabada dowladda Federalka Soomaaliya ay qaadi doonto ee ku aadan hoggaanka Ahlu Sunna, maadaama gacanta dowladda Federalka Soomaaliya ay ku jiraan.
Xaalad deganaansho leh ayaa ka jirta Magaalada Dhuusamareeb, waxaana xarunta Inji hadda ku sugan ciidanka Dowladda oo Boolis iyo Militari isugu jira.
Xafiiska Wararka Halqaran.com
Halqarannews@gmail.com
