Gaalkacyo (Halqaran.com) – Saraakiil ka tirsan Ciidanka Xoogga dalka Soomaaliyeed ayaa la xaqiijiyay in ay ku dhinteen Qaraxii ismiidaaminta ahaa ee ka dhacay goob lagu soo dhaweynayay Ra’iisul wasaaraha Soomaaliya Maxamed Xuseen Rooble ee magaalada Gaalkacyo.
Waxaa lagu soo warramayaa in qaraxa ay ku dhinteen, Taliyihii qeybta 21-aad ee milatariga xoogga Soomaaliya, Janaraal Cabdicasiis Cabdullaahi (Qooje Dagaari) iyo Taliyiyihii Ciidamada Danab, qeybta Galmudug, Korneyl Muqtaar Cabdi Aadan.
Sidoo kale, waxaa la xaqiijiyay inay dhinteen Taliye ku-xigeenkii ciidanka Danab, qeybta Galmudug, Dhamme C/raxmaan Mire Cali iyo Duqii hore ee Degmada Gaalkacyo, qeybta Puntland, Maxamuud Yaasiin Axmed (Tumeey).
Qofka naftiis haligaha ahaa ee is qarxiyay ayaa la sheegay inuu soo dhex galay Ciidankii iyo saraakiisha sugayay amniga, waxaana mar qura isla yeeray dhawaaq xooggan oo ahaa qaraxa iyo uuro.
Qaraxa ayaa sidoo kale, waxaa ku jiray dadkii ku dhintay dad shacab ah oo goobta ku sugnaa.
Ra’iisul wasaaraha Soomaaliya Maxamed Xuseen Rooble iyo wafdigiisa ayaa la geeyay xarunta Madaxtooyada Koofurta magaalada Gaalkacyo, waxaana halkaasi ammaankooda ku sugaya ciidamada Milatariga.
Xafiiska Wararka Halqaran.com
Halqarannews@gmail.com
