Hargeysa (Halqaran.com) – Somaliland ayaa Isniintii maanta ku dhawaaqday inay bilaabeyso baarista halista caafimaad ee ay keeni karaan anteenada ama taawarrada shirkadaha isgaarsiinta ka howlgalla deegaannadeeda.
Somaliland ayaa soo iibsatay qalab lagu ogaanayo awoodda hirarka ay taawarradu gudbinayaan, sida ay shaaciyeen mas’uuliyiin ka tirsan Somaliland, kadib munaasabad ka dhacday Magaalada Hargeysa.
Wasiirka isgaarsiinta Somaliland, Cabdiwali Cabdillaahi Suufi oo la hadlay laanta Af Soomaaliga ee VOA-da ayaa sheegay in qalabkan loogu talo galay inuu maamulo hirarka isgaarsiinta, in lagula socdo shucaaca ka soo baxa taawarrada iyo goobaha isgaarsiinta, iyo in lagu horumariyo cilmi baarista teknolojiyadda.
Waxaa horay ayaa u jirtay cabasho iyo cabsi laga qabo saamaynta caafimaad darro ee ka dhalan karta hirarkaas oo dad badani ka hadlaan qaarkoodna ay qoraallo ka sameeyeen.
Wasiirka isgaarsiinta Somaliland ayaa sheegay in tallaabo sharci ah laga qaadi doono shirkaddii lagu helo in ay taawarradeedu sababaan xaalad caafimaad darro.
Halka hoose ka dhageyso Codka Wasiirka Isgaarsiinta Somaliland, Cabdiweli Cabdullaahi Suufi:
Xafiiska Wararka Halqaran.com
Halqarannews@gmail.com
