Muqdisho (Halqaran.com) – War kasoo baxay Wasaaradda Arrimaha dibadda Soomaaliya ayaa lagu cambaareeyay weerar Gantaallo loo adeegsaday oo Kooxda Xuutiyiinta Yemen ay ka geysteen Magaaloyinka Riyaad iyo Jizaan ee Boqortooyada Sacuudiga.
Dowladda Soomaaliya ayaa sheegtay in ay garab taagan tahay Xukuumada Sacuudiga.
“Xukuumadda Jamhuuriyadda Federaalka Soomaaliya waxa ay si adag u cambaaraynaysaa maleeshiyaatka Xuutiyiinta iyo kuwa taageera oo beegsaday goobo dad rayid ah ay degan yihiin oo ku yaalla Magaalooyinka Riyadh, Najran iyo Jazan ee Boqortooyada Sacuudi Carabiya oo ay la dhaceen tiro gantaallada baalistik iyo diyaaradaha iskood isku-kaxeeya oo lagu rakibay qaraxyo maalinnimadii Talaadada, 23 June, waxaase ka hortagay oo burburiyay Ciidamada Isbaheysiga ee taageera Dowladda Sharciga ah ee Yemen kahor inta aysan gaarin goobihii bartilmaameedka u ahaa, taasi oo meesha ka saartay in dad rayid ah ay wax ku noqdaan” ayaa lagu yiri warka kasoo baxay dowladda.
Waxaa sidoo kale lagu xusay “Jamhuuriyadda Federaalka Soomaaliya waxa ay caddaynaysaa in ay ku garab taagan tahay Dowladda iyo Dadka Boqotooyada aanu walaalaha nahay ee Sacuudi Carabiya difaaca amnigooda gudaha iyo dagaalkooda ka dhanka ah aragagaxisada nooc kasta oo ay yihiin, waxa ay markale ku celinaysaa mowqifkeeda taageeraya dadaallada Qaramada Midoobey ee lagu doonayo xal horseeda nabadgelyo waara oo soo afjara dhibaatada ka taaggan Jamhuuriyadda aanu walaalaha nahay ee Yemen si ay ku jirto dhowridda ammaanka iyo danaha wadamada deriska la ah”
Ugu dambeyn, xuutiyiinta dalka Yemen ayaa dhawaan weerar Khasaare geystay ku qaaday boqortooyadda Sacuudiga.
Xafiiska Wararka Halqaran.com
Halqarannews@gmail.com
