Garowe (Halqaran.com) – Puntland ayaa soo bandhigay natiijada dad looga shakisnaa Cudurka Coronavirus, kuwaasi oo baaritaan lagu sameeyey, islamarkaana qaarkood laga helay Fayraska Corona.
Wasiirka Caafimaadka ee dowlad goboleedka Puntland, Dr Jaamac Faarax Xasan ayaa sheegay inay korortay 24 saac ee la soo dhaafay dadka laga helayo xanuunka Covid-19, islamarkaana la baaray 22 ruux, 8 qof oo ka mid ah dadkaasi baa laga helay.
Dr. Jaamac Faarax Xasan ayaa xusay, in dadka laga helay Cudurka Coronavirus ay ka mid yihiin laba kamid ah Wasiiradda Maamulka Puntland oo xaaladooda ay tahay mid wanaagsan.
Dhanka kale, Wasiirka ayaa sheegay in qofkii labaad uu Puntland ugu geeriyooday xarunta, kaas oo ku dhintay xarunta karantiilka Garowe.
Wasiirka Caafimaadka Puntland Dr. Jamac Farax Xasan ayaa sheegay in tirada guud ee xaaladaha COVID-19 Puntland laga diiwaan geliyay ay noqonayso 59, halka labo qof ay u geeriyoodeen xanuunka.
Ugu dambeyn, maamul Goboleedyada ka jira dalka oo ay qeyb ka tahay Somaliland ayaa waxaa laga diiwaangeliyaa kiisas badan oo Cudurka Coronavirus ah, waxaana kiisaska ugu badan laga diiwaan geliyay Puntland.
Xafiiska Wararka Halqaran.com
Halqarannews@gmail.com
