Hargeysa (Halqaran.com) – War kasoo baxey Wasiir ku-xigeenka Wasaaradda caafimaadka Xukuumadda Soomaaliya ayaa waxaa lagu sheegay in Wasaarada aan la soo gaarsiin laba kiis oo ku saabsan Cudurka Coronavirus oo Somaliland sheegtey deegaanadeeda, balse Somaliland ayaa ka jawaabtey hadalkaas.
Wasiirka Shaqada iyo Arrimaha Bulshada ee Somaliland, Hinda Xersi Gaani oo Saxaafadda kula hadashay Hargeysa ayaa ku eedeeyey dowladda Soomaaliya inay ka dagaalantay in Somaliland laga helay laba qof oo qaba Fayraska Corona (COVID-19).
“Bal qofka kuu diidey in deegaannadaada laga helay COVID-19 kuuna aqoonsan maayo bal muxuu kuu qaban karaa, halka laga sugaayey inay yiraahdaan Somaliland waa dal yar ee aan u duceyno ee haloo gurmado, haddii Somalinimada dhab ka tahay ma dhaheen Somaliland ma qabto Coronavirus”, ayay tiri Wasiir Hinda.
Somaliland, ayaa sheegtay in dowladda Soomaaliya ay ugu baaqeyso in Somaliland aysan waxba ka dooneyn, hayeeshee ay wax u qabtaan dadka Somaliyeed oo ay mas’uulka ka yihiin.
Xafiiska Wararka Halqaran.com
Halqarannews@gmail.com
