Garowe (Halqaran.com) – Madaxweynaha dowlad goboleedka Puntland, mudane Saciid Cabdullaahi Deni ayaa ka hadlay Cudurka dilaaga ah ee Coronavirus oo dunida si wayn u saameeyay, xilli Saddex kiis laga helay Soomaaliya.
“Caabuqa ‘Coronavirus’ waa khatar dunida ku soo siyaaday sidaas awgeed Dawladda Puntland waxay qaaday talaabooyin looga hortagaayo faafidda caabuqaan inuu dalka ku faafo.” Ayuu yiri Mr. Deni.
Madaxweynaha Puntland ayaa farriin u diray shacabka ku nool deeganada Puntland, waxaana uu ugu baaqay inay si dhab ah u qaataan tallooyinka caafimaad ee la siinaayo.
“Dadka Soomaaliyeed gaar ahaan Puntland waxaan ugu baaqayaa inay qaataan talooyinka Hay’adaha Caafimaadka iyo Arimaha Gudaha ee Puntland inta suurto gal ah.”
“Waan dareensanahay duruufaha dadkeena ku xeeran, lakiinse waxaan ku baaqaynaa in la yareeyo, isu socodka laga maarmi karo, xafladaha iyo kulamada sida maqaaxiyaha iyo goobaha cibaadada.”
Xafiiska Wararka Halqaran.com
Halqarannews@gmail.com
