Sh/Hoose (Halqaran.com) – Waxaa faah-faahin cusub kasoo baxaya dagaallo culus oo deegaannada Raaxoy iyo Ceelka Geelow oo ka mid ah deegaannada hoostaga degmada Balcad ee G/Shabeellaha Dhexe ku dhex maray Ciidamada Dowladda iyo Xubno ka tirsan Al-Shabaab.
Xubno ka tirsan Ururka Al-Shabaab ayaa waxaa la sheegay in kolonyo ka tirsan Ciidamada Burundi oo ka mid ah Amisom weerar jidgal ah ay ku qaadeen xilli ay marayeen deeganka Ceelka Geelow oo u dhow Tuulada Qalimow ee degmada Balcad, waxaana halkaasi ka dhacay dagaal geystay khasaaro kala duwan.
Ilaa iyo hadda si dhab ah looma oga Khasaaraha rasmiga ah ee dagaalkaasi ka dhashay, balse dadka deegaanka ayaa sheegay dagaalka in Amisom Khasaare lagu gaarsiiyay.
Sidoo kale Ciidamo ka tirsan Al-Shabaab ayaa waxa ay dagaal culus ku qaadeen deegaanka Raaxoy oo Saldhig ku leeyihiin Ciidamada dowladda Federalka Soomaaliya.
Dadka deegaanka ayaa sheegay ku dhawaad hal saac inuu socday dagaalkaasi oo labada dhinac rasaas kala duwan isku adeegsadeen.
Ugu dambeyn, saraakiisha Ciidamada dowladda ayaa sheegay inay iska caabiyeen weerarka kaga yimid Ururka Al-Shabaab, khasaarana ay gaarsiiyeen sida ay sheegeen.
Xafiiska Wararka Halqaran.com
Halqarannews@gmail.com
