Baledweyne (Halqaran.com) – Guddoomiyahii hore ee Gobolka Hiiraan Yuusuf Axmed Hagar (Dabageed) ayaa sheegay inay faraha ka baxeen ammaanka deegaannada HirShabeelle, isla markaana madaxda Maamulkaas ay dayaceen.
Dabageed ayaa sheegay inay xirmeen waddooyinka soo gala jowhar, sidoo kalena Al-Shabaab ay wax ka yar 5km u jiraan Magaalada Baledweyne ee Xarunta Gobolka Hiiraan.
Shir Jaraa’id uu Maanta ku qabtay Baledweyne, kadib markii uu kasoo laabtay Safar uu ugu maqnaa Turkiga ayuu sheegay in Afartii sano ee la soo dhaafay Madaxda Maamulka Hir-Shabeelle ay ku fashilmeen waxka qabashada dhinaca Amniga.
“Waa nasiib darro in xaalada amni darro intaas la eg ay Hir-Shabeelle ka jirto madaxda hirshabelle ay ka amusaan, waxaan dhihi karaa waa fashilmeen dadka HirShabeelle xukunka haayo ayuu yiri” Yuusuf Dabageed.
Gudoomiyihii hore ee Gobolka Hiiraan Yuusuf Axmed Hagar (Dabageed) ayaa ku soo aadaya hadalkiisa xilli waddada xiriirisa Magaalooyinka Jowhar iyo Balcad ay ka dhaceen weeraro dhowr ah ,isla markaana ay ka go’een inay maraan Madaxda HirShabeelle.
Xafiiska Wararka Halqaran.com
Halqarannews@gmail.com
