Muqdisho(Halqaran.com) –Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo oo ay weheliso Marwada Koowaad ee Qaranka Marwo Saynab Cabdi Macallin iyo wafdi uu hoggaaminayo ayaa u ambabaxay magaalada Dooxa ee dalka Qatar halkaas oo ay uga bilaabanayso booqasho shaqo oo labo maalmood ah.
Madaxweynaha oo martiqaad ka helay Amiirka Dowladda Qatar Sheekh Tamiim Bin Xamad Al Thaani ayaa kala hadli doona xoojinta xiriirka labada dal iyo sidii Dowladaha Soomaaliya iyo Qatar isaga kaashan lahaayeen dhinacyada dhaqaalaha, horumarinta ciyaaraha iyo iskaashiga maalgashiga.
“Booqashada Madaxweynaha waxaa qeyb ka ah furitaanka Koobka Kubadda Cagta ee Carabta oo lagu marti qaaday Madaxda dalalka Carabta, si loo xoojiyo iskaashiga dhanka horumarinta ciyaaraha iyo is-dhexgalka dhallinyarada Shucuubta Dalalka Carabta, iyadoo Madaxweynuhu uu kulan-doceedyo la qaadan doono hoggaamiyeyaasha ka soo qeyb-galaya Munaasabadda.” Ayuu yiri Agaasimaha Warfaafinta Madaxtooyada oo ka war-bixiyay safarka Madaxweynaha.
Sido Kale Safarka waxaa Qeyb Ka ah Wasiirka Arrimaha Dibadda Soomaaliya Cabdisaciid Muuse Cali, Wasiirka Dhalinyarada & Cayaaraha XFS Xamsa Siciid Xamsa & Guddoomiyaha xiriirka Kubadda Cagta Soomaaliyeed Cabdiqani Saciid Carab.
Safarkaan uu Maanta Madaxweyne Farmaajo ugu ambanaxay dalka Qatar ayaa kusoo aadaya xilli lagu guda jiro waqti doorasho, iyada oo dowladda Qatar Afartii sano ee la soo dhaafay ay taageereysay dowladda Soomaaliya.
Xafiiska Wararka Halqaran.com
Halqarannews@gmail.com
