Muqdisho (Halqaran.com) –Madaxweynaha JFS Mudane Maxamed Cabdullaahi Farmaajo iyo Ra’iisul Wasaaraha XFS Mudane Maxamed Xuseen Rooble oo wada hadal yeeshay ayaa xal ka gaaray arrimihii lagu kala aragti duwanaa, iyagoo soo saaray war-saxaafadeed ku saabsan qodobbadii lagu heshiiyay.
Labada mas’uul ayaa isku raacay qodobo dhowr ah, waxaana ka mid ah:-
1- In Cabdullaahi Maxamed Nuur loo daayo Wasiirka Amniga.
2- In Gen. Bashiir Goobe Wasiir Dowle loo magacaabo.
3- In Yaasiin Fareey sii ahaado Taliyaha NISA, illaa Madaxweynaha uu soo magacaabayo Taliye la isla ogolyahay, golaha wasiiradana la marsiiyo.
4- In doorashooyinka la dardar-geliyo.
5- In kiiska Ikraan Tahliil Faarax loo daayo hay’adaha Garsoorka dalka.
Ugu danbayn, Madaxda Qaranku waxay umahad celiyeen Madaxweynaha Dowlad Goboleedka Koonfur Galbeed Mudane Cabdicasiis Xassan Moxamed (Lafta gareen) iyo masuuliyiinta kale ee udhabar adaygay sidii madmadowgii madaxda qaranka ka dhexjirey loogu dhameyn Lahaa Isfahan iyo afgarad, doorashaduna usocoto si habsami leh.
Madaxda waxa ay u muujiyeen shacabka Soomaaliyeed sida ay uga xunyihiin walwalkii ay dareemeen maalmihii la soo dhaafay iyaga oo u ballanqaaday shacabka in si midnimo leh ay uga wada shaqayn doonaan sidii ay dalka uga dhicilahayd doorasho hufan loona adkayn lahaa amniga guud ee dalka.
Xafiiska Wararka Halqaran.com
Halqarannews@gmail.com
