Nairobi(Halqaran.com) –Dowladda Kenya ayaa raalli-gelin rasmi ah ka bixisay shirkii uu shaley iskaga baxay safiirka Soomaaliya ee magaalada Nairobi, kadib markii uu goobta ka soo muuqday Wakiilka Soomalilad ee kanya u jooga.
Uhuru Kenyata oo muddo laba sano kabadan aan wax wadahadal ah la yeelan xukuumadda Soomaaliya, ayaa dhowaan soo gaaray magaalada Muqdisho, isagoo qayb ka ahaa xubna mas’uuliyiin ah oo lagu sharfay in ay ka soo qayb galaan munaasibadda caleema saarka madaxweynaha Soomaaliya ee Xasan sheekh.
Safiirka Soomaaliya u fadhiya Kenya Amb Maxamuud Axmed Nuur Tarsan oo kulanka Uhuru iyo safiirada ka qayb galay ayaa kulanka isaga baxay intii uu socday kadib markii uu kulanka uu ku soo biiray safiir la sheegay in Hargeysa uu u fadhiyo Nairobi.
Safaaradda Soomaaliya ee Kenya, ayaa wasaaradda arrimaha dibadda ee Nairobi u dirtay, in ay ka warbixiso dhacdada iyo mansabka ay Somaliland kaga qayb gashay shirka Uhuru iyo Safiirada dalalka Caalamka.
Kenya ayaa sheegtay in ay qadarrin u heyso qaranimada iyo madax banaanida Soomaaliya. waxeyna ka cudurtaarteen joogitaanka wakiillada Somaliland ee Nairobi.
“Wasaaradda Arrimaha Dibedda Kenya waxay ka xun tahay sida aan ku talo-galka iyo munaasibka ahayn ee calanka Somaliland uga soo dhex muuqday dhacdo sanadeedka diblomasiyadda.
Kenya waxay kale oo rajaynaysaa inay dib u xaqiijiso aqoonsiga qarannimada hal dawlad oo federaal ah oo Soomaaliyeed iyo jiritaanka qaranka federaalka Soomaaliya.” ayaa lagu yiri warsaxaafadeed ka soo baxay dowladda Kenya.
Xafiiska Wararka Halqaran.com
Halqarannews@gmail.com
